பெண் என்னும் பேராழி

பெண் என்னும் பேராழி


பெண்ணே!

போராளியோ பெரும்பேராழியோ
விளங்கிட முடியா
வேதம்தான் பெண்ணோ!
மகளாம்  மலருனக்கு
பேதை என்ற முதற்பெயர்
தந்தவர் எவரோ!

கால்  தறித்திட மறுத்து
கேள்விகள் தொடுத்து
வீதிக்கு இழுத்து
சிற்றில் கட்டிய சிறுமிக்கு
பெதும்பை என்ற
நாமமும் தந்தனரோ!


மாசிமாதக் கொண்டலோ
மாலை நேரத் தென்றலோ
மயங்கிட வைத்து
மனமதைத் துவைத்து
மடவரல் நீதான்
மங்கையாக மலர்ந்தீரோ !

உள்ளதை உரைத்து
உவப்பினில் திளைத்து
உன்மத்தம் கொண்டு
ஊமைமொழி பேசி
வஞ்சி நீ கொஞ்சிடும் 
மடந்தையாய் காட்சியானீரோ!

இமையாய் இருந்தெமைக் காத்து
இதயத்தில் குடியமர வைத்து
அல்லிக் கொடியாகி
மெல்லப் படர்ந்திட வந்த 
இளம்பிடிதான் இல்லாளெனும்
அரிவை ஆனவரோ !

உள்ளங் கையில்
உறவினை  சுமந்து
விழியால் எமையாடிட வைத்து
தையலாகி மெய்யாய்த்
தரணியை ஆண்டிட வந்த
தெரிவை என்பவரும் நீர்தானோ!


பேராளுமையோடு 
வீட்டாளுமை செய்து
நாட்டாமையாய்
நற்கடனாற்றி
நற்பணி முடித்த
பெருமிதத்தவளாய்ப்
பேரிளம் பெண் ஆனவர் நீரோ !

பெண்ணே!

இத்தனை இத்தனை
பெயர்கள் தந்தவர் எவரோ?
எப்படி இப்படி என்ற
வியப்புதான் நினதோ?
போராளியோ பெரும்பேராழியோ
விளங்கிட முடியா 
வேதம்தான் பெண்ணோ!


மகளிர் தின நல்வாழ்த்துகள்!


Comments

  1. போராளியே பேராழியோ பெண்ணே நீ! ......அம்மையே நீ ர் எழுதிய மகளிர் தின கவிதை மிக அருமை. மகளிர் தின நல்வாழ்த்துக்கள்!

    ReplyDelete
  2. Excellent kavithai Selvabai. God bless you more and more. Happy Women's day to you.

    ReplyDelete
  3. மிக அருமையான கவிதை. வாழ்த்துக்கள்.

    ReplyDelete
  4. நட்பே வியப்பில் ஆழ்த்தியது கவிதை யுந்தன் வரிகள்...

    ReplyDelete

Post a Comment