வெற்றிடங்கள் அப்படியே இருக்கட்டும்

வெற்றிடங்கள் அப்படியே இருக்கட்டும் 

சில வெற்றிடங்கள் நிரப்பப்படாமல் அப்படியே இருக்கட்டும்.வாழ்க்கை என்பது நிறைவுகளால் மட்டுமே ஆனதல்ல; சில குறைகளாலும், சில வெற்றிடங்களாலும் அழகுபெறுகிறது. எல்லாவற்றையும் அடைந்துவிட வேண்டும், எல்லாக் கேள்விகளுக்கும் விடை கிடைத்துவிட வேண்டும், எல்லா உறவுகளும் நம் விருப்பப்படியே அமைந்துவிட வேண்டும் என்று நினைக்கிறோம். ஆனால் வாழ்க்கையின் ஒவ்வொரு வெற்றிடத்தையும் நிரப்பிவிடுவதுதான் மகிழ்ச்சி என்று சொல்லிவிட முடியாது. சில வெற்றிடங்கள் அப்படியே இருப்பதில்தான் வாழ்க்கையின் உண்மையான அழகு ஒளிந்திருக்கிறது.

1. சில மௌனங்களுக்கு வார்த்தைகள் தேவையில்லை.

ஒருவர் நம்மைப் புரிந்துகொள்ளவில்லை என்பதற்காக ஒவ்வொரு முறையும் விளக்கம் கொடுத்துக்கொண்டிருக்க வேண்டிய அவசியமில்லை. நம்முடைய உண்மையை அறிந்தவர்கள் நம்முடைய

மௌனத்தையும் புரிந்து கொள்வார்கள்.. வார்த்தைகளால் எல்லா  இடங்களையும் நிரப்ப வேண்டிய அவசியமில்லை.

2. எல்லோருடனுமான இடைவெளியை நிரப்ப வேண்டிய அவசியமில்லை

உறவுகள் நெருக்கமாக இருப்பதால்தான் சிறப்புப் பெறுகின்றன என்று நினைக்கிறோம். ஆனால் அளவுக்கு அதிகமான நெருக்கம் சில நேரங்களில் உரிமைப் போராட்டமாக மாறிவிடுகிறது. ஒருவருக்கொருவர் தனித்தன்மையையும் சுதந்திரத்தையும் மதிக்கும்போதுதான் உறவுகள் நீடிக்கின்றன. எனவே, சில உறவுகளில் சிறிய இடைவெளி இருப்பது

நல்லது..

3. சில கேள்விகளுக்கு விடை தெரியாமல் இருப்பது நல்லது

ஏன் இப்படியெல்லாம் நடந்தது? ஏன் சிலர் நம்மை விட்டுப் பிரிந்தார்கள்? ஏன் நாம் எதிர்பார்த்தது கிடைக்கவில்லை? என்று கடந்த காலத்தைத் தோண்டித் தோண்டிப் பார்க்கிறோம். ஆனால் எல்லாக் கேள்விகளுக்கும் விடை கிடைத்துவிடுவதில்லை. சில கேள்விகளுக்கான விடையைத் தேடுவதைவிட, அவற்றைத் தெரிந்து கொள்ளாமல் கடந்து செல்வதில்தான் மன அமைதி இருக்கிறது.

4. சில ஆசைகள் நிறைவேறாமல் இருப்பதும் ஒரு வரம்தான்.

நாம் விரும்பியதெல்லாம் நமக்குக் கிடைத்துவிட்டால் அதுவே வாழ்க்கையின் வெற்றி என்று சொல்ல முடியாது. சில நேரங்களில் கிடைக்காத ஒன்றுதான் நம்மைக் காப்பாற்றியிருக்கும். அன்று தோல்வியாகத் தெரிந்த ஒன்று, பின்னாளில் நமக்குக் கிடைத்த மிகப்பெரிய பாதுகாப்பு என்பதை உணர்த்தும் காலம் வரலாம்.

இதைத்தான் ஆங்கிலத்தில், "Everything you want is not always what you need" என்று குறிப்பிடுகிறார்கள்.

5. சில மனிதர்களின் இடத்தை நிரப்ப முடியாது!

நம் வாழ்க்கையில் சிலர் ஏற்படுத்திச் செல்லும் வெற்றிடம் காலத்தால் கூட நிரப்பப்பட முடியாதது. அவர்களுடைய அன்பு, பாசம், நினைவுகள் எல்லாமே தனித்துவமானவை. அவர்களுடைய இடத்தில் வேறொருவரை அமர்த்திவிட்டால் அந்த வெற்றிடம் மறைந்துவிடாது. 

6. சில எதிர்பார்ப்புகளை விட்டுவிடுவதும் அவசியம்!

எல்லோரும் நம்மைப் பாராட்ட வேண்டும், நம்முடைய நல்ல மனதைப் புரிந்துகொள்ள வேண்டும், நாம் செய்வதையெல்லாம் ஏற்றுக்கொள்ள வேண்டும் என்று எதிர்பார்க்கிறோம். ஆனால் எல்லோருடைய மனதிலும் நமக்கான இடத்தை உருவாக்கிவிட முடியாது. சில எதிர்பார்ப்புகளை விட்டுவிடும்போதுதான் ஏமாற்றங்களிலிருந்து விடுபட முடியும்.

.

7. சில பக்கங்கள் முடிக்கப்படாமலேயே இருக்கட்டும்!

ஒரு புத்தகத்தில் எல்லாப் பக்கங்களும் ஒரே மாதிரியாக இருப்பதில்லை. சில பக்கங்கள் மகிழ்ச்சியைத் தரும்; சில பக்கங்கள் கண்ணீரைத் தரும்.. அதுபோலத்தான் வாழ்க்கையும்!

கடந்த காலத்தின் ஒவ்வொரு நிகழ்வையும் சரிசெய்துவிட்டுத்தான் அடுத்த பக்கத்திற்குச் செல்ல வேண்டும் என்பதில்லை. சிலவற்றை அப்படியே விட்டுவிட்டு புதிய அத்தியாயத்தைத் தொடங்குவதில்தான் வாழ்க்கையின் முன்னேற்றம் இருக்கிறது.

நிறைவுரை

வாழ்க்கையின் அழகு எல்லாவற்றையும் நிறைவாய் பெற்றுக்கொள்வதில் மட்டும்  இருப்பதில்லை.எதை நிரப்ப வேண்டும், எதை நிரப்பாமல் விட வேண்டும் என்பதை உணர்ந்து வாழ்வதிலும்தான் இருக்கிறது.

சில இடங்களை நிரப்பாமல் அப்படியே விட்டுவிடுங்கள். அப்போதுதான் வாழ்க்கையில் உங்களுக்காகப் புதிதாக ஒன்றை நிரப்புவதற்கு இடம் கிடைக்கும்!

வெற்றிடம் என்பது குறையல்ல .சில நேரங்களில் அதுவே மனநிறைவு தருவதாகவும் இருக்கும்