இரவு நடத்தும் நாடகம்

                         இரவு நடத்தும் நாடகம்

கயிற்றுக் கட்டிலில்

 மல்லாந்து கிடந்து

 அண்ணாந்து பார்க்கையில்

 பஞ்சான மேகங்கள் 

  துஞ்சாமல் ஓட்டம் காட்டும் _ மேகங்கள்

  துஞ்சாமல் ஓட்டம் காட்டும்.!

   கொஞ்சமாய் ஒளி சிந்தி

   கஞ்சமாய் சிரித்து

   மிஞ்சும் நேரத்தில்

   விஞ்சும்  மொழி பேசி

  கொஞ்சித் துயில் கெடுக்கும் _ விண்மீன்கள்

  கொஞ்சித் துயில் கெடுக்கும்.!

   ஊதக் காற்றும்

   உரசி என்றன் காதோடு

   ஊமைக் கதைகள் பேசி

   உள்ளம் குளிர 

   உறவாடி நடுங்க வைக்கும் _ காற்று 

    உறவாடி நடுங்க வைக்கும்.!

                                

  கார்மேகம் தேடி

  கண்கள் ஓடுகையில்

  வெற்று உடம்பைக் காட்டி

  சற்றும் கள்ளம் இல்லை

 சொல்லாமல் சொல்லி நிற்கும் _ வானம்

 சொல்லாமல் சொல்லி நிற்கும்.!

 தடாகத்தில் நீந்தி

 தத்தளிக்கும் நிலவுப் பெண்ணை

அள்ளி கையில் எடுக்கையில் 

துள்ளி   ஒளிந்து நின்று

கள்ளமாய்ச் சிரித்து நிற்கும் _ நிலவு

கள்ளமாய்ச் சிரித்து நிற்கும்!

                                

சிங்கார மெட்டிசைத்து

 சிலுசிலுவெனக்  கொம்பசைத்து

 சிலிர்க்க வைக்கும் காற்றோடு

  சிருங்கார இசை கலந்து

  சீரான பாட்டிசைக்கும் _சிள்வண்டு

   சீரான பாட்டிசைக்கும்.!

                                   

   பின்னிரவு நேரத்தில் 

  பிய்த்து வைத்த பஞ்செடுத்து

  புல் பூண்டு முகமெங்கும்

  பூசி  குளிர வைத்து

  பூரிப்பு காட்டி நிற்கும் _பனித்துளிகள்

  பூரிப்பு காட்டி நிற்கும்.!

 கீழ்வானம் சிவக்கும் முன்னே

  கூரை ஏறி நின்று

  கட்டில் விட்டெழும்புவென

  கொக்கரக்கோ....கொக்கரக்கோவென

   கூவி எமை எழுப்பும்  _ சேவல்

   கூவி எமை எழுப்பும் !