விடுதலைப் போராட்டத்தில் பாரதியின் பங்கு
விடுதலைப் போராட்டத்தில் பாரதியின் பங்கு
முன்னுரை :
பாரதி என்ற மூன்றெழுத்து நாமத்தை
உச்சரிக்கும்போதே நம்முள்
உணர்ச்சிப் பொங்கும்.
உத்வேகம் எடுக்கும்.
இந்திய சுதந்திரப் போராட்ட காலத்தில் கனல்
தெறிக்கும் விடுதலைப்போர் கவிதைகள் வாயிலாக
மக்களிடையே விடுதலை உணர்வை ஊட்டியவர்
பாரதி.தனது சிந்தனைகள் மூலமாக மக்களைத்
தட்டி எழுப்பியவர்.தூங்கிக் கிடந்த சமுதாயத்தைத்
துயிலெழ வைத்தவர்.
விடுதலைப் போராட்டத்தில் பாரதியின்
பங்கு பற்றி இக்கட்டுரையில் காண்போம்.
இளமைப் பருவம் :
தென் தமிழகத்தின் எட்டையபுரம் என்ற
ஊரை உலகமெங்கும் எட்டிப் பார்க்க
வைத்த பெருமை பாரதிக்கு உண்டு.
1882 ஆம் ஆண்டு
டிசம்பர் திங்கள் பதினோராம் நாள்
சின்னச்சாமி ஐயருக்கும் இலட்சுமி அம்மாளுக்கும்
மகனாகப் பிறந்தார். பெற்றோர் சுப்பிரமணியன்
என்ற பெயர் சூட்டி, சுப்பையா என்று
வாயார அழைத்து மகிழ்ந்து வந்தனர்.
தனது பள்ளிப் பருவத்திலேயே கவிபாடும்
திறன் பெற்றிருந்ததைக் கண்ட
எட்டையபுரம் சமஸ்தான புலவர்கள்
இவருக்கு பாரதி என்ற பட்டத்தை வழங்கினர்.
அன்றுமுதல் சாதாரண பாரதியாக இருந்த
சுப்பிரமணியன் ஆகிய சுப்பையா
சுப்பிரமணிய பாரதி ஆனார். எட்டையபுரம்
சமஸ்தானத்தில் வேலை செய்த பாரதிக்கு
செல்லம்மா என்ற மனைவி உண்டு.
விடுதலைக் கவிஞர் பாரதி :
பாரதி வெறும் இலக்கியப் புலவர் மட்டும் அல்லர்.
விடுதலையை வேள்வியாகச் செய்து
கொண்டிருந்த விடுதலைப்போர் வீரர்
என்றுதான் அவரை அடையாளம் காண முடியும்.
விடுதலை! விடுதலை! விடுதலை
....
என்று சமுதாயத்தில் அனைத்து நிலையில்
இருப்பவர்களுக்கும் விடுதலை வேண்டும்
என்று வீறுகொண்டப் பாடல்களைப் பாடியவர்
பாரதி.
விடுதலை வேட்கை :
விடுதலை வேட்கை வெறிகொண்ட
ஒப்பற்ற கவிஞர் பாரதி.அவருக்கு
தாய்மொழி மீதும் தாய் நாட்டின் மீதும்
தணியாக் காதல் உண்டு.
இதனை பாரதியின் பாடல் வரிகள்
பறைசாற்றிக் கொண்டேயிருக்கும்.
" என்று தணியும் இந்த சுதந்திர தாகம்
என்று மடியும் இந்த அடிமையின் மோகம்
என்றெம தடிமை விலங்குகள் போகும்
என்றெம தின்னல் தீர்ந்து பொய்யாகும் "
என்று பாடி விடுதலைத் தாகத்தை
தூண்டச் செய்தவர் பாரதி.
"தண்ணீர் விட்டா வளர்த்தோம் சருவேசா
கண்ணீரால் காத்தோம்
கருகத் திருவுளமோ? "
என்று உணர்ச்சி பொங்க அவரது
பாடல் வரிகள் இருக்கும்.
கண்ணீராலும் செந்நீராலும் சுதந்திரப்
பயிரைக் காக்க வேண்டும் என்ற பாரதியின்
ஆசையைப் பாடலில் வெளிப்படுத்தி
நம்மையும் விடுதலைப் போராட்ட
களத்திற்குக் கூட்டிச் சென்றிருப்பார்.
நாட்டுப்பற்று :
எந்தையுந்தாயு மகிழ்ந்து குலாவி
யிருந்தது மிந்நாடே - அதன்
முந்தைய ராயிர மாண்டுகள் வாழ்ந்து
முடிந்தது மிந்நாடே - அவர்
சிந்தையி லாயிர மெண்ணம் வளர்ந்து
சிறந்தது மிந்நாடே - இதை
வந்தனை கூறி மனதி லிருத்தியென்
வாயுற வாழ்த்தேனோ "
என்று நாட்டு வணக்கம் பாடி
நானிலம் முழுவதையும் நம் நாட்டைத்
திரும்பிச் பார்க்க வைத்தவர் பாரதி.
பாரதியின் பாடல்கள் எல்லாமே
நாட்டுப்பற்றை ஊட்டி வளர்ப்பனவாகவே
இருக்கும்.
ஆங்கிலேய எதிர்ப்பு :
இந்தியா பத்திரிகையில் பாரதியின்
எழுத்துக்கள் ஆங்கில ஏகாதிபத்தியத்தைக்
கடுமையாகப் சாடின.
தனது எழுச்சியூட்டும் கட்டுரைகள் மூலம்
மக்களிடையே விடுதலை
உணர்வை ஊட்டினார் என்ற குற்றச்சாட்டு
இருந்தது.
இதனைக் கண்ட பிரீட்டீஷ்
ஆட்சியாளர்கள் அவரை சிறையில் அடைக்க
உத்தரவிட்டனர்.அதனால் அரசு பத்திரிகைக்குத்
தடை விதித்ததோடு அல்லாமல்
பாரதியையும் சிறையில் அடைத்தது.
சிறையிலிருந்து வெளிவந்த பின்னர்
பாண்டிச்சேரிக்குப் புலம்பெயரும்
சூழல் ஏற்பட்டது.
ஆனால் எந்தச் சூழல் வந்தாலும்
வீழ்வேன் என நினைத்தாயோ என
வீம்போடு பாடி தன் நிலையிலிருந்து
இறங்கிவராத தன்மானச்சிங்கம்
இந்த முண்டாசுக்கவி.
பாரதமும் பாரதியும் :
" பாரதி இல்லாப் பாரதமில்லை
பாரதமில்லாப் பாரதி இல்லை"
என்று சொல்லும் அளவுக்குப் பாரதத்தின்மீது
தீராப் பற்று வைத்திருந்தார் பாரதி.
" பாருக்குக் குள்ளே நல்ல நாடு - எங்கள்
பாரத நாடு "
என்று பாரதத்தை கொண்டாடியவர்
பாரதி.
"பெற்ற தாயும் பிறந்த பொன்னாடும்
நற்றவ வானிலும் தனி சிறந்தனவே"
என்ற பாரதியின் வரிகள் ஒரு
மந்திரம் என்றே சொல்ல வேண்டும்.
வந்தேமாதரம் :
வந்தேமாதரம் என்பதுதான்
பாரதி பாடிய முதல் சுதந்திரப் பாடல்.
பாரதி வந்தேமாதரம் என்ற சொல்லை
வடபுலத்திலிருந்து கடன் வாங்கி வந்திருந்தாலும்
அதனை ஒரு மந்திரமாகவே உச்சரிக்க
வைத்த பெருமை பாரதிக்கு உண்டு.
விடுதலைப் போராட்டக் காலத்தில் இந்த
மந்திரச் சொல்லை உச்சரிக்கும்போது
உள்ளத்தில் ஒரு உத்வேகம் மேலிடும்
என்பர்.
வா. உ. சி அவர்கள் பாரதியின் வந்தேமாதரம்
பாடலைக் கேட்டுக் கொண்டேதான்
உயிர்விட்டார் என்பது வரலாறு.
பாரதியார் இத்தகைய
தேசிய கீதங்களைப் பாடியிருக்கவில்லை
என்றால் நாடு விடுதலை பெறுவது
இன்னும் பல ஆண்டுகள் தள்ளிப்
போயிருக்கும் என்று அறிஞர் பெருமக்கள்
பலர் கூறியுள்ளனர்.இந்தக் கருத்தில் உள்ள உண்மையை
மறுப்பதற்கில்லை.
"வந்தேமாதரம் என்போம்
எங்கள்
மாநிலத் தாயை வணங்குவதும்
என்போம்" என்று வந்தேமாதரம் பாடி
அனைவரையும் பாரதத்தாயை வணங்க வைத்து
மகிழ்ச்சி கண்டவர் பாரதி.
சுதந்திர தேவி :
சுதந்திர தேவியை ஒரு தெய்வமாகவே
வணங்கி வந்தவர் பாரதி.
பாரதமாதா என்று பாரத்தைத்
தாயாக கொண்டாடி மகிழ்ந்த பாரதி
சுதந்திரத்தைத் தேவியாகக் காண்கிறார்.
அதனால்தான் ,
"இத்தரு மனையின் நீங்கி
இடர்மிகு சிறைப்பட்டாலும்
பதந்திரு இரண்டும் மாறிப்
பழிமிகுந் திழிவுற் றாலும்
விதந்தரு கோடி இன்னல்
விளைந்த தென்னை அழித்திட்டாலும்
சுதந்திர தேவி நின்னைத்
தொழுதிடல் மறக்கிலேனே "
என்று சுதந்திர தேவியை வணங்கி
நின்றார் பாரதி.
பாரதமாதா பதிகம் பாடி
பாரதத்தாயைக் கொண்டாடி மகிழ்ந்த
முதற்கவி பாரதி.
தேசிய கவி :
விடுதலைப் போராட்ட காலத்தில் பாரதியின்
தேசிய உணர்வுள்ள கவிதைகள் இந்தியர்
அனைவரையும் ஒருங்கிணைத்த காரணத்தால்
இவர் தேசிய கவியாகப் போற்றப்பட்டார்.
"சிந்துநதியின் மிசை நிலவினிலே...."
என்றப்பாடலில்
வங்கத்தில் ஓடிவரும்
நீரின் மிகையால்
மையத்து நாடுகளில் பயிர்
செய்யும் நதிநீர் இணைப்பு திட்டத்தைப்
பாடி தான் ஒரு தேசிய கவி
என்பதை மெய்ப்பித்திருப்பார்.
"மன்னும் இமயமலை எங்கள் மலையே
மாநில மீதிது போல் பிறிதில்லையே
இன்னறு நீர்க்கங்கை ஆறெங்கள் ஆறே
இங்கிதன் மாண்பிற்கெதிர் ஏது வேறே "
என்று தேசிய ஒருப்பாட்டைப்
பாடிக் கொண்டாடியவர் பாரதி.
"கங்கை நதிப்புறத்துக் கோதுமைப் பண்டம்
காவிரி வெற்றிலைக்கு மாறு கொள்வோம் "
என்று தேச ஒற்றுமையை வலியுறுத்தியவர்
இந்தப் பாரதி.
அச்சமில்லை அச்சமில்லை :
பாரதியின்
அச்சமில்லை! அச்சமில்லை!
அச்ச மென்பதில்லையே
இச்சகத்து ளோரெலாம் எதிர்த்து
நின்ற போதிலும்
அச்சமில்லை அச்சமில்லை
அச்ச மென்பதில்லையே "
என்ற பாடல் விடுதலைப் போராட்ட
ஊர்வலங்களில் பாடப்படும்
ஒரு தன்னம்பிக்கைப் பாடல் என்றுதான்
சொல்ல வேண்டும்.
"அஞ்சி அஞ்சி சாவார்
இவர் அஞ்சாதப் பொருளில்லை
அவனியிலே"
என்று சாதாரண மக்களுக்குப்
புரியும்படி அவர்கள் நிலையை
எடுத்துரைத்து அவர்களைத்
தட்டி எழுப்பியவர் பாரதி.
பெண் விடுதலை :
"பெண்ணடிமை தீருமட்டும்
பேசும் இத்திருநாட்டில்
மண்ணடிமை தீருதல்
முயற் கொம்பே "
என்பார் பாரதி.
"மாதர் தம்மை இழிவு செய்யும்
மடமை தன்னைக் கொழுத்துவோம்"
என்று பெண்களை அடிமையாக
நடத்திடும் மனிதர்களை வெகுவாகச்
சாடினார் பாரதி.
பாரதியின் பெண்ணியச் சிந்தனைகள்
விடுதலைப் போராட்டக் களத்தில்
முக்கிய பேசு பொருளாகியது.
பெண்களும் விடுதலைப் போராட்ட
களத்தில் இறங்கிப் பணியாற்ற
இது ஒரு உந்து சக்தியாக இருந்தது.
பாரதி தன் குருவாக ஏற்றுக் கொண்டவரே
விவேகானந்தரின் பிரதான சீடர்களில்
ஒருவரும் இந்தியாவில் பெண்கல்வியின்
விடிவெள்ளியும் சுதந்திரப் போராட்ட
தியாகியுமான சகோதரி நிவேதிதா என்பது
இங்கே குறிப்பிடத்தக்க ஒன்றாகும்.
பெண்ணுரிமைக்காக பெண்விடுதலைக்காக
தொடர்ந்து குரல் கொடுத்து வந்தவர் பாரதி.
"பட்டங்கள் ஆள்வதும்
சட்டங்கள் செய்வதும்
பாரினில் பெண்கள் நடந்த வந்தோம்
எட்டு மறிவினில் ஆணுக்கிங்கே பெண்
இளைப்பில்லை காணென்று...."
பெண்கள் சுதந்திரமாக வாழ வேண்டும் என்று
கனவு கண்டார் பாரதி.
முடிவுரை :
"ஆடுவோமே பள்ளு பாடுவோமே
ஆனந்த சுதந்திரம் அடைந்து விட்டோம்"
என்று சுதந்திரம் அடைவதற்கு முன்பாகவே
விடுதலைநாள் மகிழ்ச்சியைக் கொண்டாடி
மகிழ்ந்தவர் பாரதி.
விடுதலை வேண்டும் என்று சும்மா
செப்பித் திரிந்தவரல்லர் பாரதி.
இந்திய விடுதலைப் போராட்ட
வரலாற்றிலிருந்து பாரதியையோ
பாரதியிடமிருந்து இந்திய விடுதலைப்
போராட்டத்தையோ பிரித்துப் பார்க்க
முடியாது. விடுதலைப் போராட்டத்தில்
இரண்டறக் கலந்தவர் பாரதி.கடந்த
தலைமுறையின் ஒப்பற்ற விடுதலைக்கவி
பாரதி என்பதில் யாருக்கும் மாற்றுக்
கருத்து இருக்க முடியாது.
கவிதையே வாழ்க்கையாகக் கொண்டு
வாழ்ந்தோனை வாழ்க்கையே கவிதையாகச்
செய்தோனை வாயார வாழ்த்தி வணங்குகிறேன்.
வாழ்க பாரதி புகழ் ! வந்தேமாதரம் !
இன்றைய நவீன காலத்திலும் பாரதியின் பல்வேறு வகையான கருத்துகள் சமுதாயத்திற்கு தேவையாகத்தான் இருக்கிறது.அருமையான பதிவு
ReplyDelete