கிண்ணிப்பெட்டி

கிண்ணிப் பெட்டி

கிண்ணிப் பெட்டி என்றதும் ஏன்

கிண்ணிப் பெட்டியையே பார்க்காத மாதிரி

கிண்கிணியென சிரிக்கிறீர்கள்?

நீங்கள் கிண்ணிப்பெட்டியைப் பார்த்திருக்க வாய்பில்லைதான்.

ஊரில் இருப்பவர்களே கிண்ணிப்பெட்டியை

மறந்து பல ஆண்டுகள் ஆகிவிட்டன.

பெருநகரங்களில்

வசிக்கும் நீங்கள் பார்த்திருக்கவா முடியும்?

அது என்னங்க கிண்ணிப் பெட்டி...?

 என்று நீங்கள் கேட்பது 

 என் காதுகளில் விழத்தான் செய்கிறது.

 

 நீங்கள் கிண்ணிப் பெட்டி என்ற சொல்லுக்கே 

 கூகுளில் பொருள் தேடும் நவீன கால

 மனிதர்கள்.

 உங்களிடம் கிண்ணிப்பெட்டி...கிண்ணிப்

 பெட்டி என்றால் ...

 

 அட...நீங்கள் சைனா கிளே பௌல்ஸ்

 பிரியர்கள் என்பதை மறந்தே போய்விட்டேன். கிண்ணிப் பெட்டியைப் பற்றி 

நான் சொல்கிறேன் கேளுங்கள்.

 

இருக்கிறவரை  கிண்ணிப்பெட்டி

அருமை தெரியலைங்க...

யார் வீட்டிலாவது சைனா கோப்பையைப்

பார்த்தால் இந்த பௌலில் பண்டங்களை

வைத்துத்  தின்னும்

காலம் நமக்கும் வராதா என 

ஏங்கியிருக்கிறேன்.

சைனா கோப்பையில் சாப்பிடுகிறவர்கள்

எல்லாம் பணக்காரர்கள்...நாகரீகமானவர்கள்

என்ற கணிப்பு....

இக்கரைக்கு அக்கரை பச்சை.

இப்போது விதவிதமான சைனா கோப்பையை 

வைத்துவிட்டு இது எப்போது ஒழியும்...நம்ம 

கிண்ணிப்பெட்டி காலம் எப்போ வரும்

என்று ஏக்கமாக இருக்குது.

எதுவுமே இருக்கும்போது அதன் 

அருமை தெரியாது.

இல்லாமல் போனால்தான் அதன் 

அருமை தெரியும் என்பது

நூற்றுக்கு நூறு உண்மை.

 நானும் கிண்ணிப்பெட்டியை மறந்து

 பல ஆண்டுகள் ஆகிவிட்டன.

 இப்போது என்ன திடீரென்று கிண்ணிப்பெட்டி

 ஞாபகம் என்கிறீர்களா?

எல்லாம் பழைய நினைப்புதாங்க...

ஞாபகம் வருதே...ஞாபகம் வருதே

கிண்ணிப் பெட்டியில்

போட்டுத் தின்ற

பண்டங்கள் எல்லாம்

ஞாபகம் வருதே!

அவித்த புட்டும்

வறுத்த கடலையும் 

பச்சரிசி மாவும் 

சோளப்பொரியும்

உரலில் இட்டு

இடித்துத் தந்த

பனங்கிழங்கு சுவையும்

நினைவுகளாகி

ஞாபகம் வருதே!

பெட்டியின் மணத்தை 

மோந்து மோந்து

பார்த்து பார்த்து மகிழ்ந்த

நாட்கள்  எல்லாம் 

ஞாபகம் வருதே!

நல்லா ஞாபகம் வந்துச்சி போங்க...

எங்களையும் ஞாபகப்படுத்தி விட்டுட்டீங்களே

என்று கிண்ணிப்பெட்டியில்

தின்றவர்களின் நினைவலையில்

வெளியாகும் பெருமூச்சு

அப்படியே காற்றலையில்

மிதந்து எங்க வீடுவரை வருதுங்க....

அவித்த சிறுபயிற்றின்மீது

கொஞ்சம் தூக்கலாக தேங்காய்த்

துருவலைத்  தூவி

கிண்ணிப் பெட்டியில் போட்டுத்  

தருவாங்க பாருங்க...

அடடடா...எந்த ஸ்டார் ஓட்டல்

உணவும் கிட்ட நிற்க முடியாது.

கேழ்வரகு புட்டு அவித்து 

கிண்ணிப் பெட்டியில் போட்

தேங்காய்த் துருவலைத் தூவி...

தின்று பாருங்க...நாளைக்கும்

வேணும். ...வேணும் என்று 

கேட்டு வாங்கி சாப்பிடுவீங்க.....

கிண்ணிப் பெட்டியின் மணமே 

இன்னும் கொஞ்சம் வேணும் ....இன்னும்

கொஞ்சம் வேணும் .....என்று

ஆவலைத் தூண்டும்.

 

சுக்குமாவு  உருண்டைப் பிடிச்சு

கிண்ணிப் பெட்டியில் வைத்துத்

தின்னுப் பாருங்க...சுக்குமாவின்

மணம் பெட்டியின் மணத்தோடு 

சேர்ந்துகொள்ள ....

எனக்கு இன்னும் ஒண்ணு தாங்க

என்று அடம்பிடித்துக் கேட்க வைக்கும்.

அதுவும் அம்மா தந்ததும்... ஒளிச்சு வைத்து

யாரும் கேட்டுவிடக்  கூடாது என்று 

கப்பு கப்புன்னு அள்ளி வாய்க்குள்ள

இருத்தி ....விக்கி...வெடவெடத்துப் போயி...

மறைத்து மறைத்து வைத்துத்

தின்ற காலங்கள்...

ஐயோ....என் கிண்ணிப் பெட்டி

தந்த இன்பமே தனிதாங்க...

நினைத்த நேரத்தில் நினைத்த

உணவை ஆர்டர் பண்ணி 

உண்கிற நகர வாழ்க்கை

மகிழ்ச்சிதான். இல்லை என்று

சொல்லவில்லை.

எனினும் என் கிண்ணிப்பெட்டி

ஆசை மட்டும் மனதுக்குள் கிடந்து

எதையோ தொலைத்துவிட்ட

உணர்வைத் தந்து கொண்டே இருக்கிறது.

ஓடிப்போயி கிண்ணிப் பெட்டி வாங்கி

அதில் வைத்து சிற்றுண்டிகளைச்

சாப்பிட வேண்டும் என்று தோன்றுகிறதல்லவா!

இதோ ...இப்பொழுதே...

நமது மகளிர் சுய உதவி 

குழுக்கள் உங்க வருகைக்காக

காத்துக் கொண்டிருக்காங்க....

பனையோலை  கிண்ணிப் பெட்டியை

வாங்குங்க... வகை வகையான 

நம் பாரம்யரிய உணவுகளை 

கிண்ணிப் பெட்டியில் வைத்து

சாப்பிடுங்க....என்றுதானே சொல்ல வருகிறீர்கள்.

உங்களுக்குச் சாத்தியமாயிற்று...

எங்களுக்கும் சாத்தியமாகும் காலம்

வருமா....

ஏன் இல்லை?

அமேசான் இருக்க எல்லாம்

சாத்தியமே.

என்றென்றும் கிண்ணிப் பெட்டி

நினைவுகளுடன் நான்.